News#Urr2

Like us, find us, follow us      

Cohen-Tannoudji, atomo eta fotoi artean

Claude Cohen-Tannoudji Fisikako Nobel saridunak argiari eta materiari buruz hitz egin du bere hitzaldian. “Argia eta materia eta horien arteko elkarrekintzak ulertzea ezinbestekoa da fisikaren alorrean” adierazi du Cohen-Tannoudjik. “Argia  atomoen egitura aztertzeko oinarrizko informazio-iturria da, eta gainera, atomoak manipulatzeko ere erabil daiteke” gehitu du. Gaiaren garrantziaz jabetzeko zenbait aplikazioren adibideak jarri ditu. Erresonantzia magnetikoetan hautematea zehatz-mehatz egiteko teknika baten adibidea aipatu du, besteak beste.

HITZALDIAK

Grafeno miresgarria argitara

Grafenoari buruz mintzatu da José María Pitarke bere hitzaldian; Graphenean sintetizatutako grafeno-geruza bat ere erakutsi dio jendarteari, alegia, elkarri lotutako karbono-atomoz eratutako bi dimentsioko geruza bat. Grafenoa bi dimentsiokoa dela esaten da, karbono-atomo bakarreko lodierakoa delako. Material horrek propietate "miresgarriak" dituela esan du Pitarkek. Besteak beste, "beste edozein material baino malguagoa eta sendoagoa da -aipatu du-. Katu baten bibotea adina pisatzen duen grafeno-geruza baten gainean katu osoa jar dezakegu geruza apurtu gabe".

Zulo beltzak, espazioko xurgagailuak

Atzo Bilboko Bizkaia Aretoan bezala, Jocelyn Bell astrofisikari britainiarrak orain arteko hitzaldietan landu gabeko gai bat jorratu du gaur Donostiako Victoria Eugenia antzokian: zulo beltzak. “Zulo beltzak espazioko xurgagailuak dira. Hurbiltzen zaien guztia xurgatzen dute eta zulo horietan sartzen den materia oro desagertu egiten da” azaldu du Bellek. Baina, zenbat hurbil gintezke zulo horietara haiek gu irentsi gabe? “Objektuaren masaren araberakoa da hori” dio. Zer gertatuko litzaiguke zulo beltz batera hurbilduko bagina? Ez da ideia ona - azpimarratu du -­, suntsitu egingo baikinateke.

Bazenekien ...

TREBAKUNTZA-TAILERRAK

Ikerketari aplikazioak bilatzeko tailerra

Gaur hasi dira ikertzaile gazteei bideratutako trebakuntza-tailerrak. Tecnalia Ventures-eko Asier Rufinok ikerketaren balorizazioaren ikastaroa eman du. Oinarria ikerketan duten aplikazioak garatzeko gako eta osagaiak eman ditu ezagutzera Rufinok. Hau da eman duen gako garrantzitsuenetako bat: "Prozesu horien lehengaiak beti izan behar du erakunde edo enpresa batek duen arazo bat; geuk garatzeko gai garen teknologiaren bidez konpon dezakegun arazo bat. Ez da zuzena gerora nori interesa dakiokeen pentsatzera eramango gaituen teknologiak garatzea".

Balorizazioaren tailerraz gain, aste honetan aurkezpenei eta dibulgazioari buruzko tailerrak ere ematen ari dira ikertzaile gazteentzat.